Paalam Aking Mahal

Joselito Asi (c) 8 Agosto 2010

 

Akala ko’y tuluyan ka nang nawaglit

Sa isip at puso ko’y ikaw’y tinikis

Lahat ng nangyari’y pilit na inalis

‘Pagkat walang magandang bunga ang maling pag-ibig.

Ngunit ang tadhana’y sadyang mapaglaro

Nakita kang minsang walang kibo

Iiwasan ka sana’t agad akong lalayo.

Ngunit tumimbuwang nadagil ang pinto.

Halakhakan ay di magkamayaw,

Munting pagkakamali ko’y agad sinumbatan

Ngunit nang tingnan ka sa dakong likuran

Kamay mo’y inabot, hiya ko’y naparam

Puso ko’y walang tigil sa pagpintig

Kapag kasama kita’y lagi nang may kilig

Ngunit batid kong mali’t di dapat ipilit

Dahil ikakasal ka na sa kaibigang matalik.

At tayo nga ay nagka’walay

Luha ko kanina’y ngayo’y hikbi naman

Kabiguang dulot tila magpakailanman

Kawangis ng kandila sa init ay nalulusaw.

Agad akong umuwi’t kumuha ng punyal

Isang saksak agad kong iniunday

Sa puso kong bigo sakit ay ninamnam

Buhay kong ito’y akin nang wawakasan

Ngunit bago ako lumisan

Sana'y marinig mo aking hirang

Paalam, paalam

Paalam aking mahal.